१
ट्रेन्डिङ
पोखरा । युनाईटेड क्लबको आयोजनामा १४ औँ संस्करणको पोखरा महोत्सव हुने भएको छ । ‘युवाको जाँगर राष्ट्र निर्माणको आधार’ भन्ने नाराका साथ आयोजना हुन लागेको महोत्सव पुस २९ गतेदेखि माघ ११ गतेसम्म सञ्चालन हुनेछ ।
शिक्षा, स्वास्थ्य, खेलकुद तथा पर्यटन प्रवद्र्धनमार्फत देशको आर्थिक समृद्धिमा सहयोग पुर्याउने र रोजगारी सिर्जना गर्ने उद्देश्यले महोत्सव आयोजना गरिएको महोत्सव संयोजक दिनेश सुनारले जानकारी दिए । उनका अनुसार महोत्सवमा करिब २ लाख २० हजार दर्शक सहभागी हुने अनुमान गरिएको छ ।
महोत्सवमा विभिन्न जातजातिको कला, संस्कृति, भेषभूषा र पहिचान झल्किने प्रदर्शनी तथा जानकारीमूलक कार्यक्रमहरू राखिनेछन् । साथै हस्तकला सामग्रीको प्रदर्शनी तथा बिक्री, पर्यटन प्रवद्र्धनसम्बन्धी सामग्रीको प्रदर्शन र जानकारी प्रदान गरिने संयोजक सुनारले बताए ।
महोत्सवमा करिब २५० वटा स्टल रहनेछन् । फरक क्षमता भएका व्यक्ति, ज्येष्ठ नागरिक, एकल महिला, विदेशी पर्यटक तथा पाँच वर्ष मुनिका बालबालिकालाई निःशुल्क प्रवेशको व्यवस्था गरिएको छ ।
कार्यक्रममा राष्ट्रिय तथा स्थानीय कलाकारहरूको विशेष प्रस्तुति रहनेछ । लोकदोहोरी तथा सांगीतिक कार्यक्रमतर्फ रवि कार्की, शान्तिश्री परियार, बद्री पंगेनी, प्रकाश सपुत, समिक्षा अधिकारी, अर्जुन सापकोटा, शान्तारानी परिवार, अस्मिता अधिकारीलगायत कलाकारहरूको प्रस्तुति रहनेछ । कन्सर्टतर्फ पूर्ण राई, डि मर्चा, लेकाली, जेम्सी, सविन राई, भिटेन, लाहुरे, टुकीलगायत कलाकारहरूले दर्शकलाई मनोरञ्जन दिनेछन् ।
क्लबका पूर्वअध्यक्ष राजु श्रेष्ठका अनुसार पोखरा–२७ अर्चलेमा युनाईटेड छात्रावास निर्माण गर्ने लक्ष्य राखिएको छ । महोत्सवबाट प्राप्त आम्दानी सोही भवन निर्माणमा खर्च गरिने उनले बताए ।
अमरसिंह माध्यमिक विद्यालय व्यवस्थापन समितिका अध्यक्ष कृष्ण कोइरालाले विद्यालयको शैक्षिक गतिविधिमा असर नपर्ने गरी कार्यक्रम आयोजना गरिएको जानकारी दिए । क्लबले विद्यालयलाई विभिन्न क्षेत्रमा सहयोग गर्दै आएको र विद्यालयको जग्गा संरक्षणमा समेत योगदान पुर्याएको उनको भनाइ छ ।
नेपाल पत्रकार महासंघ कास्कीका अध्यक्ष माधव बरालले उद्देश्यकेन्द्रित कार्यक्रम आयोजना गर्न आयोजकलाई सुझाव दिँदै कार्यक्रमले स्थानीय व्यवसाय, कला, संस्कृति तथा पहिचानको संरक्षण र प्रवद्र्धनमा कति योगदान पुर्यायो भन्ने विषयमा आत्ममूल्यांकन गर्न आवश्यक रहेको बताए ।
भ्याली खबर डटकमले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषणलाई समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेसण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
