२१ औँ लेखनाथ महोत्सव पुस ३ गतेदेखि तालचोकमा सुरु हुँदै

पोखरा, पुस २७ — पोखरा–२७ तालचोकमा पुस ३ गतेदेखि १४ गतेसम्म २१ औँ संस्करणको लेखनाथ महोत्सव आयोजना हुने भएको छ। स्थानीय उत्पादन र उद्यमशीलता प्रवद्र्धनलाई मुख्य प्राथमिकता दिँदै लेखनाथ उद्योग वाणिज्य संघले महोत्सवको विस्तृत योजना सार्वजनिक गरेको हो।

संघका अध्यक्ष तथा महोत्सवका मूल संयोजक जानुका पराजुली अधिकारीका अनुसार २०५८ सालमा सुन्तला प्रदर्शनीबाट सुरु भएको यो पहल २०६१ सालदेखि औपचारिक महोत्सवका रूपमा निरन्तर हुँदै आएको छ। उनका अनुसार यस वर्ष पनि स्थानीय तथा राष्ट्रिय स्तरमा उत्पादित सामग्रीहरू—कृषि उत्पाद, महिला उद्यमीका सामग्री, हस्तकला, खाद्यान्नदेखि शिक्षा र स्वास्थ्यसम्बन्धी वस्तुहरू—को प्रदर्शनी तथा बिक्री हुने छ।

प्रचार–प्रसार संयोजक ध्रुवबाबु भट्राईका अनुसार बिषम आर्थिक अवस्थामा पनि व्यवसायीलाई ऊर्जा प्रदान गर्न, बजारलाई सक्रिय बनाउन र स्थानीयदेखि राष्ट्रिय अर्थतन्त्रमा जीवन्तता ल्याउन महोत्सव महत्वपूर्ण रहनेछ।

यस वर्ष करिब ३३५ स्टल रहने मेला अवलोकन गर्न २ लाख ५० हजारभन्दा बढी दर्शक आउने अनुमान छ। करिब ९ करोड रुपैयाँ बराबरको कारोबार हुने अपेक्षा गरिएको छ। महोत्सवबाट करिब ९५ लाख रुपैयाँ आम्दानी, ८५ लाख रुपैयाँ खर्च भई १० लाख रुपैयाँ बचत हुने आयोजकले जनाएको छ।

महोत्सवमा औद्योगिक तथा व्यापार मेला, हस्तकला, दैनिक उपभोग्य सामान, फेन्सी–कस्मेटिक, विद्युतीय उपकरण, फर्निचर, खेलकुद सामग्री, सूचना–प्रविधि, अटोमोबाइल, खाद्य महोत्सव, बालउद्यान तथा लेखनाथ क्षेत्रका मौलिक उत्पादन—सुन्तला, मौरी, कफी, माछा र जैविक वस्तुको विशेष प्रदर्शनी रहनेछ।

सांस्कृतिक झाँकी, र्‍याली, महिला विशेष कार्यक्रम, रत्यौली, विद्यालय स्तरीय प्रतियोगिता, टिकटक तथा कन्टेन्ट क्रिएशन प्रतियोगिता, सुगम संगीत, राष्ट्रिय कलाकारहरूको स्टेज प्रस्तुति, हास्यव्यंग्य र पप कन्सर्ट महोत्सवका थप आकर्षण हुनेछन्।

महोत्सव अवलोकनका लागि सर्वसाधारणको टिकट मूल्य १०० रुपैयाँ, विद्यार्थीका लागि ५० रुपैयाँ र बेलुकाको कन्सर्टका लागि २०० रुपैयाँ तोकिएको छ।

‘महोत्सव लेखनाथको संस्कृति, स्थानीय उत्पादन, विकास र समृद्धि’ भन्ने मूल नारासहित सञ्चालन हुने कार्यक्रममा सहजीकरणका लागि १० सदस्यीय निर्देशक समिति, ४८ सदस्यीय सल्लाहकार समिति, ४३ सदस्यीय संयोजक समिति, ६६ सदस्यीय कार्यसम्पादन समिति तथा करिब ३०० सदस्यीय मूल समारोह समिति गठन गरिएको संघले जनाएको छ।

आयोजकका अनुसार महोत्सवबाट हुने बचत रकम नवउद्यमी प्रवर्द्धन, उद्यमशीलता विकास, औद्योगिक क्षेत्र निर्माण तथा पर्यटन प्रर्वद्धनमा लगाइनेछ।