१
ट्रेन्डिङ
पोखरा । पोखरा महानगरपालिका वडा नम्बर २२ का स्थायी तथा अस्थायी बासिन्दाले प्रयोगशाला परीक्षणमा छुट पाउने भएका छन्। वडा कार्यालय र पोखरा महानगरपालिका नगर युवा परिषद्को सहकार्यमा नेशनल प्याथ ल्याब एन्ड रिसर्च सेन्टरले वडावासीका लागि यस्तो स्वास्थ्य सुविधा उपलब्ध गराउने भएको हो।
सम्झौताअनुसार वडाका नागरिकले ल्याबमा गरिने नियमित प्रयोगशाला परीक्षणमा २० प्रतिशत तथा विशेष परीक्षणमा १० प्रतिशत छुट पाउनेछन्। यस्तै,शिविरमा सुगर र क्रियाटिनिन परीक्षण भने निःशुल्क गराउन सकिने व्यवस्था गरिएको छ।
निःशुल्क परीक्षण सेवा लिन चाहने वडावासीले सम्बन्धित निकायबाट आधिकारिक सिफारिसपत्र ल्याउनुपर्नेछ। वडा कार्यालय, नगर युवा परिषद्, वडा युवा परिषद्, टोल विकास समिति, महिला समूह वा विकास समितिको सिफारिसका आधारमा निःशुल्क परीक्षणको सुविधा लिन सकिने जनाइएको छ।
स्वास्थ्य सेवाको पहुँच थप विस्तार गर्ने उद्देश्यले वडामा आवश्यकताका आधारमा निःशुल्क स्वास्थ्य शिविरसमेत सञ्चालन गरिने ल्याबले जनाएको छ। स्वास्थ्य शिविर आयोजना हुने मिति, समय र स्थानबारे कम्तीमा पाँच दिनअघि नै सम्बन्धित नागरिकलाई जानकारी गराइनेछ।
यससम्बन्धी समझदारीपत्रमा पोखरा–२२ का वडाध्यक्ष हिमलाल बराल, नेशनल प्याथ ल्याब एन्ड रिसर्च सेन्टरका कार्यकारी पोखरा शाखा प्रमुख अच्युत अधिकारी र पोखरा महानगरपालिका नगर युवा परिषद्का कार्यकारी उपाध्यक्ष सन्तोष न्यौपानेले हस्ताक्षर गरेका छन्।
सम्झौताले वडाका नागरिकलाई नियमित स्वास्थ्य परीक्षणमा आर्थिक राहत पुग्नुका साथै आवश्यकताअनुसार स्वास्थ्य सेवाको पहुँच विस्तार हुने अपेक्षा गरिएको छ।
भ्याली खबर डटकमले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषणलाई समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेसण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
