१
ट्रेन्डिङ
पोखरा – साहसिक यात्रा र मोटोभ्लगिङमार्फत पहिचान बनाउँदै आएकी पोखराकी चेली सुरक्ष्या केसीले अन्तर्राष्ट्रिय स्तरमा नयाँ उपलब्धि हासिल गरेकी छन्। विश्वप्रसिद्ध सामाजिक सञ्जाल Instagram को आधिकारिक ‘Reels’ च्यानलमा उनको भिडियो फिचर्ड भएसँगै नेपाली डिजिटल क्रिएटरहरूको पहुँच विश्व बजारसम्म पुगेको छ।
इन्स्टाग्रामले सीमित संख्यामा मात्र अकाउन्टलाई फलो गर्ने परम्परा राख्दै आएको छ। हाल करिब २०१ अकाउन्टलाई फलो गरिरहेको इन्स्टाग्रामको सूचीमा सुरक्ष्या केसीको ‘imsurakshyakc’ अकाउन्ट समावेश हुनु नेपाली क्रिएटर समुदायका लागि गर्वको विषय बनेको छ। करिब ६९ करोडभन्दा बढी फलोअर्स रहेको इन्स्टाग्रामको आधिकारिक प्लेटफर्ममा उनको सामग्री स्थान पाउनु आफैंमा ठूलो उपलब्धि मानिएको छ।
नेपालका विभिन्न पर्यटकीय गन्तव्यहरूमा मोटरसाइकलमार्फत गरिएको यात्राका दृश्यहरू, साहसी र प्रेरणादायी महिला राइडरको छवि प्रस्तुत गर्ने उनका भिडियोहरूलाई इन्स्टाग्रामले विश्वव्यापी दर्शकमाझ प्रस्तुत गरेको हो। यस उपलब्धिसँगै उनी सम्भवतः पहिलो नेपाली महिला मोटोभ्लगर हुन् जसको सामग्री इन्स्टाग्रामको आधिकारिक Reels च्यानलमा फिचर्ड भएको छ।
पोखरालाई कर्मथलो बनाएर यात्रा सुरु गरेकी सुरक्ष्याले लामो समयदेखि नेपाली पर्यटन प्रवर्द्धन र साहसिक मोटरसाइकल यात्रालाई डिजिटल माध्यममार्फत अघि बढाउँदै आएकी छन्। उनको यो अन्तर्राष्ट्रिय पहिचानले नेपाली मौलिकता, साहसिक पर्यटन र डिजिटल क्रिएटरहरूको क्षमता विश्वस्तरमा चिनाउन थप टेवा पुग्ने अपेक्षा गरिएको छ।
उनको सफलतापछि सामाजिक सञ्जालमा शुभेच्छुक र प्रशंसकहरूको बधाईको ओइरो लागेको छ भने इन्स्टाग्राममा फलोअर्सको संख्या र भिडियोमा आउने अन्तर्राष्ट्रिय प्रतिक्रियासमेत तीव्र रूपमा बढिरहेको छ। यस घटनाले नेपालका युवा तथा महिला राइडरहरूलाई नयाँ उचाइ छुन प्रेरणा दिएको छ।
भ्याली खबर डटकमले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषणलाई समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेसण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
